在電視劇《女拳》中飾演霍元甲傳人霍冠威的黃德斌，一頭白髮的中華英雄Look，以迷蹤拳與黃飛鴻切磋武藝，氣定神閒的表現，確令一眾師奶觀眾愛得要死，不過當霍冠威遇上粗獷味十足的LandRoverDiscovery4，一代宗師變一代樂師，原來他最注重音響的質素呢！
記者：趙慧敏
攝影：楊錦文
應付崎嶇山路
猛男總與四驅車產生不可解釋的化學作用，所以邀約黃德斌試車，雖然他正忙於開新劇，亦二話不說即答應！不過就講明拍照對象最好是LandRover或RangeRover，果然外形夠Man，品味亦很Man。
最終找來柴油版的LandRoverDiscovery4，未想到雙方初次邂逅，黃德斌對於對方底蘊早已瞭如指掌。開車歷史不短，對車，黃德斌自言心態亦與o靚仔時有所不同，「以前開車最緊要夠快，講性能及速度，家人大了，反而實際最緊要，多用途車最啱我心水，尤其是出外景，經常到荒山野嶺，最好架車幾崎嶇嘅路都行到就最啱。」
最緊要聲夠靚
我想猛男的答案絕對不是門面話，事關一次在西貢拍攝時，就遇上黃德斌開着其富豪旅行車經過，年份及車型都不是路經會望多兩眼那種，「我真係覺得旅行車幾實用，放得多雜物，揸起嚟都好舒服，有時將我隻老虎狗放入去，擺埋部單車一樣得。」至於在車身上花得最多錢是甚麼？「一定係部音響，車主要代步，唔會花錢改車，反而我會裝套靚音響，揸住車聽歌都係一種享受，唔知咁講完，是否有人會偷我部音響呢，哈哈！」
討厭迷蹤一族
電視劇中黃德斌以迷蹤拳與黃飛鴻的鐵線拳比試，不過現實中，黃德斌最討厭「迷蹤一族」，「自己唔會開快車都係呢個原因，馬路上太多盲毛車手，揸緊車都唔知自己想點，又或者以為自己車神上身，害人害己。」說起這些馬路「瘟神」，竟突然覺得黃德斌頗有大師氣派，若電視台再要宣傳交通安全，大可打他主意。
一定揀環保車
不過對車男人永遠都是花心的，那麼假如要換車，黃德斌又是否有心儀目標，「車款暫時無乜心水，不過如果要換車，一定會揀環保車，最好係柴油車！」但佢又話鍾意LandRover同RangeRover呢啲大食王？「咁家佢哋都係用環保偈唧，你睇吓，咁大架車都係用3公升引擎，輸出超過二百匹馬力，仲唔夠環保呀。」又給你說得通。難怪跳上駕駛座，原來一面Cool樣的黃德斌亦顯得一面雀躍，實行要第一時間摸透車內裝置，話唔定無幾耐，就可以見黃德斌揸住呢架車在街上出現！
Discovery43.0TurboDiesel
馬力：241bhp/4,000rpm
扭力：600Nm/2,000rpm
傳動：6速四驅
售價：$645,000
查詢：27132383（LandRoverHK）