羅樂林密密死都算係死得轟烈，「死訊」遠播五大洲，一時間做咗國際巨星，都咪話唔傳奇。近日有隊香港組合N'Gine都忍唔住要抽羅樂林水，將佢24小時死5次嘅驚人事迹記錄喺首歌度，《同是天涯羅樂林》就咁誕生嘞！
呢首《同是天涯羅樂林》擺到明係將蔣志光、韋綺珊嘅經典歌《相逢何必曾相識》重新填詞，歌詞夠晒啜核同抵死o架，好似「同是一人羅樂林，廿四粒鐘死幾鑊是奇人」、「世間都該知道佢是誰、紅遍日美外國勁過大作各大報都在訪問」，畫面就配番本報嘅動新聞同埋《喜劇之王》嘅片段，都咪話唔惡搞。
「改得押韻」
馮仁昭噚日打電話畀羅樂林，原來佢噚日接受港台訪問，都有聽過呢首歌。問佢對呢首歌有乜嘢睇法，佢就話：「其實好多嘢都好巧合，好奇怪，因為跟住嗰套《點解阿Sir係阿Sir》，又係有蔣志光演嘅。劇中有啲配樂好似都係用『同是天涯淪落人』，但套劇未出街，原來有班網友已經用呢首歌巧合地改編，所以好多嘢都係巧合。」羅樂林仲話唔介意俾人惡搞，反而覺得首歌改得幾押韻，幾過癮㖭！