為食又識食嘅「肥佬黎」黎智英經常喺專欄講飲講食，八方有時睇完都吞口水，與佢同枱食飯又係乜嘢滋味呢？大家有機會去肥佬黎屋企食餐飯，記者協會43屆周年晚會5月20日舉行，今年籌募經費拍賣有新搞作，其中一個拍賣品係「666智英飯局」，投得者可以去肥佬黎大屋食晚飯。
拍賣飯局構思係記協諗出嚟，主席麥姐話黎生好支持記協同新聞自由，因此爽快答應幫忙籌款。黎府家宴今年6月6日晚上6點舉行，名額七人，每位底價10,000蚊，任何人都可以出價；可以競投一個位，亦歡迎出價包起全圍，總之價高者得。結果會喺5.20晚會上宣佈。
周潤發捐沙龍照拍賣
麥姐話未知「智英飯局」菜單，但黎生素來對食有要求，相信唔會令人失望。八方問去過肥佬黎屋企食飯嘅人，多數對煲足料老火湯印象最深，有人話咖喱牛腩好惹味，亦有人指糯米炸子雞冇得頂，單尾碟炒飯利落乾爽，絕不能錯過咁話。
今年記協籌款晚會喺香港JW萬豪酒店舉行，主禮嘉賓係港交所行政總裁李小加，八方聽聞賣枱情況理想。除咗「智英飯局」，其他兩項拍賣品都好特別，記協情商周潤發捐出攝影作品一幅連親筆簽名，眾所周知發哥係沙龍高手，鍾意四處影相，至於佢捐出邊幅作品暫時要保持神秘，因為連記協都未見過，既然如此，記協索性對發哥沙龍不設底價。另一件拍賣品係紅酒，由顧明均捐出一支Richebourg–DomainedelaRomaneeConti（1998,Methuselah）紅酒，底價10萬元。據講顧明均不時一擲千金買心頭好，又鍾意同老友分享佳釀，希望有同道中人買到呢支好嘢。
mailto:[email protected]
競投方法
有興趣競投肥佬黎家宴、顧明均紅酒同發哥沙龍，可以將個人資料、聯絡方法及出價，電郵至mailto:[email protected]，或填表格寄回記協。截標日期為5月20日中午12時。
詳情可瀏覽記協網站 http://www.hkja.org.hk/site/portal/Site.aspx?id=A1-922&lang=zh-TW
記協籌款搞新意
除咗包括肥佬黎飯局等拍賣，記協今年周年晚會仲安排咗三個表演項目籌款，第一個係由前規劃地政局局長蕭炯柱做指揮，帶領柴灣樂團演奏《龍鳳呈祥》同《金蛇狂舞》。哥頓蕭離開官場後成立青年音樂訓練基金樂團，出錢出力栽培學生，聽佢指揮真係唔只聽音樂咁簡單。
第二個節目係由音樂人區新明創作一首向記者專業態度致敬嘅歌，仲搵記者合唱，唱盡近年全城焦點新聞包括爭產案、汶川地震等；最後則係由TVB前記者「柳爺」柳俊江棟篤笑，分享由記者變成「車衣女工」嘅生涯，有機會大爆CCTVB秘聞。三個表演節目歡迎捐款贊助，為記協籌募經費。
同股神畢菲特食一餐 值二千萬
名人拍賣飯局，最矚目嘅相信係股神畢菲特（圖）嘅天價慈善午餐，2000年首次拍賣，08年拍出211.01萬美元，由中國內地「私募教父」趙丹陽投得。畀超過1,600萬港元同股神食餐晏匪夷所思？未必！去年中股神飯局再公開拍賣，有9個人競投，競爭十分激烈，總共出價77次，底價2.5萬美元，最後以263萬美元成交，即係逾2,000萬港元食餐飯。據說股神飯局食三個鐘頭，以最多8個人出席計，每個位要超過256萬港元。捨得畀呢個價錢，餐飯食乜怕且無所謂，最重要係嗰種名氣、豪氣，應該足夠回味一世。
