【第30屆香港電影金像獎頒獎禮之甘拜下風】楊千嬅前晚在金像獎頒獎禮大熱倒灶，輸給劉嘉玲，昨日她出席活動時，坦言是恨攞影后獎，但今次敗給前輩嘉玲是心服口服，她自言是電影頒獎禮新丁，能打入五強已經很開心。
楊千嬅憑《志明與春嬌》提名金像獎最佳女主角獎，賽前她雖然被一致看好，但最終由劉嘉玲憑《狄仁傑之通天帝國》獲得，千嬅昨日在銅鑼灣出席黃柏高為無綫收費台主持的《Paco的風花雪月》節目記者會時，她的心情頗好。
接受遊戲規則
原來千嬅一向欣賞嘉玲演技，賽前看好嘉玲會得獎，她說：「我雖然都恨攞獎，唔係入呢行做乜？但我喺影壇頒獎禮係新丁，仲有大把時間可以再去努力拍代表作。」問她會否覺得輸給嘉玲的年資？千嬅說：「我唔會理呢啲嘢啦，輸就係輸啦，要玩呢個遊戲就要接受人哋嘅規則，其實對我嚟講，入到五強已經好開心，一步步嚟啦，我唔急，金像獎係我目標，失敗會令人進步嘅，我會繼續努力。」
千嬅最開心是前晚有老公丁子高陪伴出席，她說：「宣佈結果已經唔係重點，最重要係佢緊握住我隻手，呢個係我夢寐以求嘅感覺，噚晚實現咗啦。到嘉玲上台領獎時，佢講嘅得獎感言令人好感動，我都諗唔到入五強面對公佈結果一刻會咁鬼緊張嘅，老公比我更緊張，握住我手時，佢手都濕晒！」
成龍欲咀安安
此外，前晚老闆林建岳拉大隊到K11商場搞慶功，因為該公司投資彭浩翔執導的《志明與春嬌》奪最佳編劇獎，莊文強執導的《飛砂風中轉》得新晉導演，陳奐仁演出的《李小龍》獲最佳新演員獎。成龍前晚在慶功宴見到余安安就忍不住擁抱說：「我要同你嚟一個徐靜蕾式嘅吻！」
採訪：溫敏芝 攝影：林德雄