周末時分走入九龍城，雖不及旺角人流密度，但與小城平日寧靜相比，實是足夠繁忙。居民希望平靜時刻長此下去，但做生意的，自然還得神落，求神拜佛長嘈長雜。之前要說的甜酸苦辣餘下兩味，找來以下對象，繼續訴說。
記者︰吳美美
攝影︰伍慶泉、王文忠
Model︰CindyYeung@Starzpeople
龍城舊物
城中人氣小食
苦的代表頗為理所當然地找到了「陳仔凉茶」，作為舊區，起碼要有一兩間賣凉茶作撐場吧？陳仔的葛菜水賣到城內城外街知巷聞，當是合適之選。酸的代表則與其餘幾位不同，她是九龍城的地標，但非以食揚名，全因她屬城內唯一的大型商場，但卻未因此要風得風。曾經幾許冷清，十室九空，至2006年翻新由難以定位的粉紅與紫色轉而活力鮮明的鮮綠色，再於2008年改名換姓，九龍城廣場轉名KCP，當中的做極不起，自是令人感到辛酸。
酸
九龍城廣場曾被覬覦變豪宅
店名：九龍城廣埸
主打︰城內唯一商場
老闆：「玩具大王」蔡志明
轉手年份︰2008年
地址︰賈炳達道128號
曾經風光明星到訪
1993年，九龍城廣場落成面世，回想當時有PizzaHut、百視達、百佳、肯德基，各式連鎖品牌齊齊進駐，配合各式小店，一下子廣場成為龍城居民日常焦點，亦吸引周邊學生午市放學準時到場消費，還記得當年更邀來紅星如陳慧琳搞過簽名會宣傳電影《天涯海角》。
好景維持數年後，機場搬離，元氣大傷，繼而金融風暴吹至，部份小型商戶頂不住而結業；再來是大品牌如歡樂天地於1999年突然結業、2004年百視達停止香港業務，底層自助餐、由幾家食肆組成的FoodCourt逐漸收檔。沒有承租就長期用布蓋住底層，分批的關門大吉令廣場熱鬧氣氛不再。自此，廣場搞極不起，偶然引入的租客都以短期租約為主，搭時從玻璃看出去，行來行去的都是小貓三數隻，做極不起的情況從此深入廣場深處。與現時九龍城廣場推廣部經理蔡小姐談到當時情況，她說，「隨着舊啟德機場的遷移，加上經濟金融風暴的吹襲，九龍城區的發展亦需要經歷一段較長時間的重新整合，而商場運作需要配合多方面的互惠關係，包括周邊環境發展、業主、商戶及顧客等因素。無疑九龍城廣場亦在某程度上受着區內大型發展方向所影響。」做生意的，時攻時守，但守的時間似乎太多吧？
大摩染指屬意變臉
數數手指，能捱得住風吹雨打，站穩腳至現在的，除了連鎖食肆超級市場外，真的所餘無幾。看看資料，仍屬摩根士丹利（大摩）時期的九龍城廣場，雖於2007年將之改頭換面，由色調、外牆、場外土地都進行重整動工，但可惜經營依然散亂，沒有焦點。最要命是敵不過地價樓價攀升，大摩更入紙城規會申請將九龍城廣場改為住宅發展，擬建三幢27層高住宅連地庫停車場，有區議員因此發起「一人一信行動」力保城內唯一大型商場，最後議案亦遭否決。原來只差一點，廣場已經消失，真的酸上加酸。
2008年6月，玩具大王蔡志明從大摩手中以近15億元買入九龍城廣場，給他剛加入公司地產部的細仔蔡加讚一次試練機會。接手一年後，成功令商場格調提高，十室不至於九空，再次出現紅星到場表演，令人心酸的歷程終於完結。對於紅星再臨，蔡小姐一一數出來，「其實商場近年為迎合年輕化口味及市場需求，邀請了不少明星藝人到場表演，例如周杰倫、楊千嬅、薛凱琪等。當然，以明星作招徠只是商場推廣活動的一部份而已。」若本身無番咁上下斤両，當紅人物絕不會到爛場搞騷的。九龍城以食為骨幹，身為居民一分子的小記，曾希望不如將廣場變為有如「蔡瀾美食坊」，蔡小姐這樣回應：「商場其實一向以綜合性購物及消閒娛樂為定位，正好與區內過百間獨立食店互補不足，為顧客提供舒適的購物及消閒娛樂環境。」噢，似乎願望又落空。
苦
搬來搬去不出九龍城
店名：陳仔凉茶
主打︰葛菜水、龜苓膏
老闆︰賴漢宇
營業年份︰1997年
地址︰衙前圍道17-19B舖
敬業樂業服務街坊
食串串燒，飲碗葛菜水，就是這條街的飲食習慣。陳仔凉茶搬了幾次舖位，由之前的龍崗道（位置已被重建過），走到過來衙前圍道現在經營串燒的位置，再落腳於現在「粗菜館」之畔。幾次的轉變都離不開這幾條街，走不出九龍城，就算與附近另一間陳仔面對面，仍然如常在城中營業。有想過出走龍城嗎？老闆賴漢宇微笑道：「無呀，要敬業樂業吖嘛！當服務街坊咁囉，因為最熟悉就係呢區。」小記好耐無聽過「敬業樂業」這四個大字啦！
街坊熟客，個個都知陳仔開咗幾廿年，咁到底是幾廿年呢？答案是：「正確年份都唔清楚，始創人是我叔公，根據佢口述，應該是五幾年開檔。早期喺中環威靈頓街，做咗幾年先搬過來九龍城。我在八九年先接手，因為佢年紀大，仔女又無意思接手，咁啱我有興趣，又可以幫到手又搵到飯食，兩全其美。原先舖位喺龍崗道，不過家都拆咗啦。」有無留意到賴生當是姓賴，但點解招牌是陳仔呢？答案是，叔公正是姓陳，陳仔招牌由他創立，既然檔口由他傳授得來，就無謂改啦。
苦茶中還有苦故事
賴生講過，以前機場職員、舊有客仔，都會專登返嚟幫襯重溫一碗價值七蚊的葛菜水。講真，分分鐘搭車仲貴過飲一碗凉茶！引得客人回頭，招數是甚麼呢？「我哋葛菜水同坊間唔同，主要材料配方唔同。野葛菜係主料，再加埋九乾菜、雞骨草、羅漢果，我哋又用明火煲足三個小時，再想保持新鮮就早晚煲一次。好多人返轉頭原因，就係因為碗葛菜水唔會過氣！」飲凉茶，通常企喺檔口前面，不用一分鐘就能消滅，飲飲吓再望一望周圍，發覺斜對面又有一間陳仔！分店嗎？還是有分正宗老字號？有些八卦人如我，就多口問了賴生。但從他猶豫而不太情願提起的語氣中，約略得知答案如下：「其實佢係我親阿哥，本身係一齊做，之後大家因為價值觀問題而分開做，就算家屋企聚會都會有打招呼。初初我分出來做就比較辛苦，因為喺舊舖我負責煲，佢負責出面賣，街坊多數認得佢。其實原先都係叔公教我煲，我再教佢，不過，我覺得呢啲嘢只係自己家庭事，無謂公諸同好。無話邊個啱定錯，喺我角度嚟講都係各有各做，好多人唔知就靠估……」嗱嗱嗱，各位八公八妹，幫你哋問咗。下次嚟到請專心飲茶食膏，反正大城小事隨處可見。
苦之選
