經常聽人講，入市要講時機，不過，原來大家同時間入市，又同時間沽貨，結局都會好唔同。
上個禮拜，慳妹睇報章嘅二手樓盤成交報道，兩個業主不約而同喺08年初買入新樓盤，咁啱又喺近期易手，但係兩個業主一個賺一個蝕。咁有趣嘅題目，敏妮即刻攞嚟睇。
買港鐵站上蓋 竟損手
兩個業主買嘅物業各有不同，業主甲層樓係將軍澳某港鐵站上蓋大型屋苑，至於業主乙層樓就係舊區黃大仙單幢樓。驟眼睇，你估邊個賺邊個蝕？港鐵附近大型屋苑，交通方便、設施完善，點計都保值，同舊區單幢樓比，後者一定輸蝕。世事往往就係咁出人意表！
大型屋苑加上港鐵站作賣點，樓價會較硬淨，但呢個係蝕嘅個案。話說，當時嗰個樓盤唱高開低，呎價貼近區內市價，而且一夜沽清逾千伙，業主搶購，以430.9萬銀買返嚟，家賣價410萬，未計買賣手續費，蝕廿萬。
至於黃大仙層單幢樓，位置吊腳，當年業主以327萬元買入，家陣365萬銀成交，獲利38萬，升值12%。一直都話買樓最緊要睇三樣嘢，location、location、location，黃大仙雖然都係地鐵沿線，但同喺正港鐵上蓋比，稍遜一線，出入市時機大家相同，問題就喺價錢上面。既然業主甲買嗰層樓條件高一線，咁好條件，發展商賺盡亦係人之常情，咁試問接貨嘅業主又邊有賺嘅水平？今次呢個故事，會唔會提醒到有心置業買新盤嘅買家呢？
溫敏妮
http://wanmanli.com/blogs/