球星遇到狂蜂浪蝶，唔多唔少都會有份滿足感，但如果狂蜂係狂「瘋」，咁就麻煩夾手尾長。曼聯球星里奧費迪南舊年被「瘦版威廉絲」3度騷擾，不勝其煩提出控告。女方前日受審前一度逃走，雖然周二被拘捕，但怕且不速之客已經令里奧嚇到鼻哥窿都冇肉，驚咗成年。
深夜摸上門騷擾家人
容貌同網球名將威廉絲有幾分相似嘅38歲女子伊寶，被指喺舊年2月至6月期間曾3次摸上門。據講，呢位癡情粉絲住喺倫敦南部，每次到訪里奧喺柴郡嘅屋企，來回行程400哩。「最初我好嬲，然後覺得好困擾，因為我有一個年輕嘅家庭。呢個並唔係同我傾偈嘅適當時間、適當地點。」里奧勞氣好合理，屋企外邊突然整個咁嘅不速之客，比你都驚啦？
消息指，伊寶第一次摸上門係深宵時份，當時里奧兩老公婆瞓緊覺，突然聽到大門嘅對講機有聲響，望出去睇見屋外有個女人望上嚟，形迹可疑，里奧決定報警，警告完放人。後嚟，伊寶連續兩次企喺里奧間屋嘅對面馬路，里奧頂唔住決定控告對方騷擾。
癡女：「我會再見你」
單案件前日開審，女方作供後夠膽死向里奧整句「我會再見你，拜拜！」，里奧唔嚇死至奇。咁仲唔止，呢位女士前日準備聽判詞前突然失蹤，好彩警方做到嘢，星期二將佢拘捕，如果唔係，里奧唔知仲要驚多幾耐囉。
正如檢察官所講，雖然里奧費迪南係公眾人物，但佢同家人都享有私隱權，伊寶就算幾傾慕里奧都唔應該騷擾人。想做里奧紅顏知己？唔係唔得，一係你有性感女神周秀娜咁好嘅條件，又或者透過正常途徑，其他方法就唔好諗啦。伊寶「3氣」（氣死）里奧確係夠抵死，忽發奇想，里奧近一年表現差晒，除咗因為傷患，怕且同呢個奇女子令佢長期陷入恐慌有關。
另外，上周末曼聯對曼城有段小插曲，曼聯體能教練史杜域克不嬲好火，當日將溫布萊更衣室嘅牆踢爛，多咗個窿，曼聯周二公開為事件道歉，少不免要準備賠番啲維修費。
