閱讀有關九龍城的報道，樓宇動態啟德郵輪碼頭當佔一席位，但以量取勝的話，講飲講食的必然排頭。最賣座的當以泰菜為首、糖水殿後、加插打冷邊爐等令龍城越燒越旺！單看周末旺場情況，外城人來到似乎越逼越合皮。但旺場非必然，想到機場搬離那時城內肅殺情形，對照如今情景，依然坐鎮的老舖當能嚐遍甜酸苦辣。
記者︰吳美美
攝影︰伍慶泉、王文忠
Model︰CindyYeung@Starzpeople
以上提到的甜酸苦辣，小記挑了四個在城內有地位的單位以作代表，分別是甜的代表合成糖水、酸的代表九龍城廣場、苦的代表陳仔凉茶、辣的代表小曼谷泰國菜館。由四位在城中有若干年資又有份量的人口中，道出與九龍城同行期間，不知不覺的唇齒相依關係。比起單一化地解構九龍城，可能聞得更多背後故事，你很久沒有擔定凳仔聽故事吧？
辣
九龍城文化是泰國文化
店名：小曼谷泰國美食
主打：泰菜
老闆：詹漢光
營業年份︰2001年
地址︰南角道8-10號地下
九七7.1落雨死得啦
小曼谷是南角道的地標。打個比喻，「你知道南角道在哪裏嗎？」「不知道。」「那小曼谷呢？」「知道呀！」情況就是這樣子。亦是由他開始，九龍城的泰菜更加為港人所知，泰人相繼開店，辣起了九龍城。
「以生意人角度嚟講，呢度係一個英雄地，得同唔得三個月就知，無得守。我眼見好多，三個月之後就無咗。」老闆詹漢光，泰國華僑，三歲來港後就如同港孩般讀書返學，小時候最愛到寨城走來走去，「寨城係一個好得意嘅地方，出面有的這裏有，出面無的這裏亦有。我住喺裏面時已經有泰菜，記得第一間泰菜館就係黃珍珍，在屋企開檔，類似舊式的私房菜。」長大了，走去開波鞋舖，九七前生意好到不得了，行家互通的不是「今日有無生意？」等問題，而是「開咗新舖未？」最高峯時開了四間，但一過了中英交接期，生意即時變淡，亦造就了開泰菜的契機，即小曼谷的雛形。「九七前後我是開鞋舖的，當時幾好生意，但一到九七，最深刻印象7月1日，除了交接儀式仲有傾盆大雨，心諗大鑊，死得啦！之後生意就變差，執吓一間執吓又一間，最後就抽身出嚟唔搞。當時知道媽咪阿姨識煮嘢食，不如做間泰菜細細哋試吓！家庭式，無刻意要做成點，夠交租畀人工就算。點知越做越多人，每晚都有三十幾個客等位。」小記記得，當時他們的舖位約莫只有一百呎，內裏最多只有三、四張凳，但門外起碼加多了七、八張凳。厲害的是，南角道已有泰農、隆姐坐鎮，隔一條街還有黃珍珍、金寶等殿堂級泰菜，小本經營唔覺意做出頭。
泰國人拎我餐牌去抄
當一間最初只能容納三、四張凳的家庭式小店，變成逼滿食客的菜館，左右街坊有意行其舊路執口水尾在所難免。「泰國人唔會諗嘢，見你好似好生意，就照辦煮碗抄。好似我做細檔口家庭式經營時，已經算是第一間，點知一年之間就開了形形色色規模類近的。但佢哋抄面唔抄餡，夠膽死，隔籬後面舖直情拎我個餐牌去抄！然之後每樣平兩蚊，完全無創意，無加無減！總之我做乜佢做乜，總之平我兩蚊，嗰陣時真係o架！」
泰國人比起香港人，明顯野心小、純樸，賺來的夠養家就算。但面對未來城中轉變，如郵輪碼頭面世，詹生全以負面應對：「我個人完全反對起郵輪碼頭，我本身生意已經好夠，你多啲人流都無用，最怕係俾地產商坐地起價。你可以重點寫出我講嘅呢句心聲，起碼頭對九龍城舊區只有壞處而沒有益處，最好個地鐵站起喺隔籬街！」一句「好夠」已是證據，沒有因將來人流的增加而有擴充的打算，反而憂慮未來重建要搬舖的可能。「都搵緊舖頭，同Partner同阿妹傾過，一係搬舖一係買間舖頭，如果唔係俾人牽住鼻哥走都幾煩！不過都要喺返九龍城開，因為就算第時轉型由舊變新，都會保留原先嘅人喺度，九龍城文化就是泰國人文化，所以最大可能會在附近重開。」○九年，九龍城還引入了代表泰國新年傳統的潑水節；今年，前天仍冒雨舉行，龍城泰國已密不可分。
辣之選
■豬頸肉、雞肉串燒，每串$7起。
甜
無一間舖頭同我一齊開到家
店名：合成糖水
主打︰潮式糖水
老闆：梁壯權
營業年份︰1997年
地址︰龍崗道9號地下
九七龍城儼如死城
「件事真係好機緣巧合，唔嚟九龍城就唔會見到發哥，見唔到發哥就可能發展完全唔同晒，加速唔到個宣傳效力，但當然自己嘅嘢都要得，其他人只係助你一把。」梁壯權到九龍城開合成糖水時，正值九七，無幾耐，機場搬離，人流直插，各式舖頭執得就執，他是如此形容當時情況：「執笠嘅情況真係好得人驚，前面嗰間又執，啱啱開無幾耐又執，開完又執再開又執。呢個情形起碼維持咗一兩年，基本上無一間舖頭同我一齊開到家。」印象中真的有某個時候，九龍城儼如死城。無辦法，落差太大了，本身早午晚人流絡繹不絕，一下子被抽個中空，有幾個能適應？還要當時梁壯權孭兩間舖在身，惟有死頂，「遇咗靜，做生意無可能一步到位。嗰陣時下午十二點做到凌晨四點，而且深水埗舖頭仍然做緊，我要兩邊走。呢邊四點鐘收工，就拎晒材料例如蓮子百合過去深水埗煲，六點鐘就又開工，前面煲材料後面淥麪，做到十點幾糖水煲起，呢邊嘅早市做完，十一點幾十二點又將糖水搬返去九龍城開舖，叫夥計睇住先，自己就上樓上瞓一兩個鐘。係咁足足做咗兩個禮拜，但發覺真係兼顧唔到，最後決定唔做深水埗，全職做九龍城呢間。」舊派人的逆來順受，力撐精神，體味靜默小城原是沉着應戰。
潮州人集結他鄉
泰人多不消多提，舊時九龍城也積滿潮（州）人勢力。梁壯權選擇到此建立自家事業，亦緣來於潮：「九龍城不嬲都多潮州人，我自己本身亦是潮州人，初時就諗可以同聲同氣，第時關係又可以好啲，喺度開舖會吸引到自己同鄉過來幫襯。所以本身在深水埗已算是做到穩住陣腳，心諗不如出來試吓，就行過嚟九龍城睇吓。我都有去過其他地方睇過環境，土瓜灣、紅磡、尖沙嘴都有去，但我始終都係鍾意呢度，因為呢度行到邊打個招呼都是潮州人。」字裏行間不乏又同鄉又潮州人，不為他的，最緊要他鄉遇故知。九龍城潮（州）人集結，為他帶來城中獨一無二的潮式糖水。就是如此的專門，小記擔心政府發展「發」走了唯一的合成，姑且問問梁壯權會如何自處？「唔做啦！收地收到埋嚟就唔做啦！不過都真係唔知，要睇到時候嘅心情先做決定。如果因為起郵輪碼頭或者周圍都係豪宅，而係咁加租，到頭來平衡唔到不如唔做。」Oh！No！忽然問起梁生「合成」名字從何而來？他說：「我阿爺改嘅，嗰陣時佢有五個仔一個女，希望一齊合力做起間舖頭，合作成功，所以叫做合成。」政府呀，不如我哋都「合成」--一齊合作，搞好龍城。
甜之選
