鷗翼跑車郁啲過百萬，點買得起！「唔係喎！真係好抵，即管睇睇啦！」既然如此，車主亦抱姑且一看的心態前往睇車，未料眼前看見的鷗翼不是林寶堅尼，反而是蓮花Elise。真係無諗過蓮花都可加對翼！最後在老友價下，將這輛在港難得一見的鷗翼蓮花據為己有。
記者：趙慧敏
攝影：伍慶泉
Model：Yoyo
車輛提供：JPGMotor（27933389）
日本師傅親自安裝
虧佢諗到將Elise改成鷗翼，原來這位前車主大有來頭，是城中玩車玩到出晒名的潮人，難免連車都玩得咁潮。蓮花一向以輕量化為目標，馬力唔算強，不過由於車架至內裝都以輕量化為目標，所以飆起來唔係人咁品。既然完美，無乜人諗到點改，不過呢個鷗翼改法真係令人刮目相看，且並非山寨貨，而係由日本著名改車配件公司TMR親自操刀。
佢哋有專門開發Elise的配件，不過唔好以為兩翼齊飛要連門換埋，唔使咁浪費，功臣主要是靠升降鉸，就可令車門升起。這對鉸極輕，不會增加負重，不過單是這對升降鉸便盛惠577,500日圓，折合港幣約$54,000，都咪話唔揦脷。雖然在日本TMR網頁內圖文並茂介紹安裝升降鉸的程序，不過這位前車主為保證順利升降，更要求該公司的日本技師到香港進行安裝，可見他對車輛的執着。
女士開門也不困難
親身試玩鷗翼車門，發現屬全手動設計，要先如車門般正常推開，再向上拉高，由於門鉸有油壓裝置，加上車門輕巧，一般女士開關都不大困難。
車門既然是技師親自駕臨安裝，這輛Elise要改的地方當然不止於鷗翼車門。為統一黑色魅力，全車套上O.ZRacing前16吋及尾17吋碳黑合金軨，引擎換上風箱連入氣量更大的生氣批，抽入冷空氣，加上車尾鈦金屬排氣喉，令車身進一步減磅外，排氣亦更加暢順。至於內櫳，蓮花一向以簡約見稱，無謂的配件可免則免，所以這位前車主只將腳踏及入風位等，換上碳纖物料，令車形更添辣味。
改裝鷗翼逐格睇
想知道點樣將推門改為鷗翼，喺TMR網頁內就有詳細介紹改裝過程，例如在車頭沙板位切割小部份裝入門鉸，再接駁至車門位置，唔好以為加個鉸咁簡單，接駁位一定要精準，否則漏水就小事，大則隨時門都甩埋。想知鷗翼變身過程，又想睇吓TMR仲有乜Elise配件產品，可以上呢個網址。
網址： http://www.tmr-eng.com/及http://www.tmr-eng.com/parts.html
1.切割車身沙板部份位置安裝門鉸。
2.安裝後要固定位置。
3.安裝後鷗翼只可垂直升降，與一般外向揚有所不同。
