「分燊家」事件告一段落，四太梁安琪接受《華爾街日報》訪問，大談掌管澳娛嘅大計。雖然該報以「一個澳門贏家的誕生」（AwinneremergesinMacau）為題，但就以「現年50歲的前舞蹈演員」嚟介紹四太。
正是「英雄莫問出處」，今日掌管何鴻燊賭業王國嘅四太，講到成為分燊家嘅大贏家時回應，「唔可以話誰勝誰負，都要睇邊個最能夠令公司發展得更好！」字裏行間滲透住意氣風發。
鴻圖大計唔保證實賺
四太又話：「每個人有唔同嘅角色，我管理賭場係要諗辦法點樣做得更多、點樣賺得更多。」講到呢度，當然唔能夠唔講吓佢嘅13億美金鴻圖大計，包括建造一個澳門主題公園同度假村，裏面有6間酒店、一個室內海灘同一個馬術中心。
佢好謙咁話，呢個項目滿足咗佢從頭開始做項目嘅慾望，雖然唔保證100%成功，但有時做嘢唔係為賺好多錢，唔使蝕兼為澳門人提供就業機會就得。呢頭話要諗辦法賺得更多，呢頭又話唔蝕就得，呢啲係咪就係贏家嘅風範呢？