保頓剛剛喺英足盃俾史篤城大炒出局,今季餘下賽事要爭歐洲賽參賽資格亦有難度,所以佢哋亦開始為下季計劃各項活動,包括決定喺7月中,到美國進行季前集訓,仲會同侯斯頓戴拿模踢番場熱身賽。原本對戴拿模會係一場別具意義,因為保頓陣中嘅賀頓(右)就係嚟自侯斯頓戴拿模,但呢位美國國腳早已經因為被曼聯莊尼伊雲斯剷傷提早收「咧」,仲要係下季開始前都應該未能夠復出,即是會缺陣呢場友賽,比賽號召力亦減弱。不過,相信保頓屆時肯定要賀頓亮吓相,見吓班同胞球迷。