最近多番唱淡樓市嘅美聯集團（1200）副主席黃錦康，日前對華華表明心迹，話發覺樓市的確受到不少利淡因素衝擊，所以先會睇淡。不過，政府近期一鋪過推出9幅市區住宅地，修正咗地區錯配，新界供應多但市區供應少嘅情況，所以轉頭唱番好樓市。
被指出口術挫樓價
先後發表「非理性亢奮」、「錯誤安全感」，轉頭又收番唱淡言論，繼續唱好樓市，難免會俾市場話佢出口術挫樓價，想多做啲生意。黃錦康就解釋，「作為大公司唔只識得賺錢，仲要帶有社會責任感，例如沙士後中央救市，我就帶頭第一個話樓價必定谷底反彈，事實證明樓市預測逐一實現啦。」
他仲話，之前日日袋定封辭職信，如果公司唔同意佢嘅預測，佢就功成身退。結果唔單止唔使走，仲升做副主席，將自己前途押落去，好多人都冇佢呢種膽識。