由97年瞓街抗爭，到舊年向支持政府政改方案嘅親北京陣營群眾熱情揮手，呢兩幕都係卿姐嘅經典新聞場面。
講開新聞，卿姐從政之前係做記者，最近TVB將一段卿姐80年代報道新聞嘅片段出土，無綫電視記者劉慧卿當年身穿吊帶裙戴住烏蠅太陽眼鏡做扒，31年後睇番依然覺得佢好型！
着住吊帶裙露香肩
無綫推出咗個叫《新聞檔案》嘅環節，回顧吓舊聞，好多觀眾都覺得，呢個環節最吸引嘅係可以睇番好多TVB前記者做扒。上星期五，佢哋播返80年代有關新加坡點解決塞車問題嘅報道，當年去當地採訪嘅記者劉慧卿，喺大約1分20秒嘅報道中，做咗三個扒。當年28歲嘅卿姐相當苗條，仲着住吊帶裙露出香肩同一雙玉臂。
新加坡又熱又曬，做到第三個扒，卿姐索性出動埋私伙太陽眼鏡出鏡。有網民激讚當年卿姐好潮，感慨今時今日嘅CCTVB冇可能睇到吊帶裙直播囉。
有人亦話舊時嘅無記新聞部接受度好強呀，呢一點，唔使睇記者做扒都feel到啦。