以前打政府工做公務員係鐵飯碗，家陣港府高官病倒、入廠、請辭，講明呢碗飯唔易食。同樣唔易食嘅一口飯應該要數董事會秘書。上市公司董事會秘書係公司高管，要承擔法律責任，要對外發言，責任唔輕，但又隨時被炒。
為咗保障董秘權益，噚日上海證券交易所頒佈新修訂嘅《上海證券交易所上市公司董事會秘書管理辦法》，修訂96年嗰套政策，目的係提高上市公司管治水平。
不得隨意炒魷
新嘅管理辦法講明，為咗保障董秘有效履行職責，上交所除咗要求上市公司喺辦法公佈後一個月內，修訂董秘工作制度，明確佢哋嘅高管地位，上交所又明確董秘任職、解聘條件同相關程序，令上市公司唔可以隨便炒啲董秘。咁都未算，仲講明董秘有公司重大事項嘅知情權，言則董秘唔使驚俾人炒，當公司出事時，仲可以有知情權，咁咪方便跳船？