自從廣管局舊年批咗昌興國際（803）主席黃炳均做亞洲電視大股東之後，大家以為台灣股東蔡衍明會慢慢淡出，點知原來係一個美麗的誤會，亞視「義務股東」王征同黃炳均一幫會正式執掌ATV，雖然面對如斯局面，但蔡衍明私人助理兼亞視董事之一黃寶慧噚日好肯定咁話，「蔡董仲未放棄做亞視，佢唔會賣亞視。」仲殺入去睇數㖭。
保安先拒後放行
你唔肯放棄，唔代表人家會接受你。原來自舊年11月尾開始，蔡衍明一方一直唔知亞視嘅經營、財務狀況，連亞視管理層間嘅會議紀錄、亞視同廣管局之間往來紀錄，佢都無法得知，於是蔡衍明位公子蔡紹中（亞視董事）上個禮拜發咗封律師信畀亞視董事局，表示抗議之餘，仲要求亞視喺噚日中午12點前提供佢哋要求嘅文件同資訊。
黃寶慧噚日一早由台北飛嚟香港，校正12點就同律師踩入亞視，希望要個答覆，但「人未走茶已凉」，門口嘅保安竟然唔識黃寶慧係邊個！
擾攘一陣，黃寶慧先同律師入到去。聽講，亞視方面由公司秘書吳宇慧，同市場營業部高級副總裁欒振國招呼黃寶慧。入得去唔代表有結果，不得要領嘅黃寶慧話，亞視已經3個月無開過董事會，咁樣係違反公司章程，要同律師研究下一步點行動。蔡衍明稍後發聲明，話非常重視今次事件，又話會支持佢公子「為履行董事職責所做、將採取的一切行動。」
對於蔡董陣營嘅行動，亞視晚上亦發聲明，話「鑑於蔡衍明先生起訴查先生及亞洲電視的官司尚未了結，亞洲電視有充份理由這樣做，並已委託律師處理。」
公說公有理，婆說婆有理，華華惟有問吓廣管局高見，佢哋話，作為本地免費電視節目服務持牌機構，亞視有責任遵守《廣播條例》同牌照條款嘅所有有關要求。《廣播條例》同牌照條款就無規定亞視召開董事局會議次數。管廣局又話，作為香港成立嘅公司，亞視有責任遵守《公司條例》所有有關要求，但廣管局最後補充，佢哋並非《公司條例》下嘅執法機構。睇嚟，又一單審死官矣！
李華華
mailto:LiWaWa@AppleDaily.com