曾班子僅餘一年左右任期，問責團隊已經五勞七傷，接連有高官患病入院。佢哋患病係咪同工作有關八方唔敢講，不過精神科醫生曾繁光噚日喺個電台節目度就語帶雙關咁提點一班官員，話如果同時滿足到阿爺同市民嘅要求，咪可以心平氣和，否則「有壓力嘅時候咪好慘囉」。
攰嘅時候就冇智慧
曾繁光噚日接受商台訪問，話知道林D9做完手術翌日即刻返工，不禁替佢擔心，「做乜咁博呀？」
佢話家高官壓力大，工時長，唔只有害健康，仲影響思維，成日廢噏也可能由此而起，又會求其做決定，簡單化處理，「所以有時啲政策出嚟都幾啼笑皆非都唔定」。
講完高官，曾醫生又話港人成日要一步到位，遇着唔啱聽嘅高官就鬧到佢狗血淋頭，近乎人身攻擊；佢特別過幾招畀班高官，話唔好成日傾向喺0同1之間做決定，好似派6,000蚊咁，只係諗派定唔派，唔識諗點派先公平合理，點樣先真正幫到低下階層，「攰嘅時候就冇智慧，有時唔做好過做」。
原來曾醫生唔只識醫人，仲識借題發揮搞楝篤笑。