中國經濟大好友龐寶林，除咗喺內地投資同開戶儲人民幣，賺息賺價之餘，個人強積金組合更加100%押注中國基金。佢話，雖然中國過去二、三十年經濟發展已經好快，但資本市場發展仍然係雛形，將來仲有大把空間拓展，未來10年更加係重要時刻。
佢估計，內地經濟會呈上升拋物線走勢，持續向好，原因係以往中國嘅國內生產總值（GDP）增幅大，但5年規劃實施之後，政策取向變得清晰，上市公司增長亦都相應變得穩定，「如果咁都做唔好就抵打啦。」
對於中央屢次出招打壓內地樓市，喺內地投資樓市多年嘅龐寶林反應正面，「內地越打壓，越代表泡沫唔會大，其實中國正值第二次創富浪潮，中國人嘅錢亦越嚟來越多，要令樓價唔升，其實已經好難。」