上個禮拜六英超下游又再執位，韋根（圖）可以話係贏家之一！因為韋根喺場護級大戰作客3:1擊敗黑池，由包尾大幡連升3級到第17位，但黑池就跌咗落降班漩渦排第18位。類似情況嘅有伯明翰主場2:0氣走新特蘭，以較佳嘅得失球差將對方踢落15位，自己排第14之餘仲有少踢1場優勢。
另外，布力般流浪作客0:2輸畀愛華頓跌到第16位，同降班區只係爭兩分企梗喺懸崖邊。韋斯咸喺完場前補時階段失守，主場1:2不敵維拉，眼白白睇住維拉上岸，自己就同狼隊齊齊沉淪榜末。雖然槌仔幫以較好嘅得失球差排第19位，之不過比狼隊踢多1場，形勢好唔樂觀。今季英超仲有5個禮拜左右就完，第12位至第20位之間只係差6分，分分鐘要到最後一輪先知邊隊降落英冠，隨時好睇過爭冠軍。