愛錢─—人之常情；無本生利─搵食最高境界。開口埋口講基金嘅東驥基金管理董事總經理龐寶林，自細就扭盡六壬希望無本生利，「細個會喺湖邊等啲有力划船出湖，但又無力划返埋嚟嘅情侶，幫佢哋划返埋岸搵錢，佢哋想唔俾我賺都唔得。」除咗划船，執石榴、捉魚拎去賣，統統零成本，叻仔也！
不過，金融圈專修叻仔，唔驚咩？「當你知呢個決定係啱嘅時候，你就要用理性嘅手拉住感性嘅手，合埋眼將錢放落去。」龐寶林話，逆市見真章。
01年「911」事件後，美國揮軍報復，龐寶林話「聽見炮彈聲要投資」。03年沙士，佢視之為「內戰」，覷準北京正面向疫症「宣戰」，趁低吸納中國股票基金。08年底，歐美政府救市後，預測09年熊市結束。
今次日本核危機，佢話轉捩點係群眾搶鹽，恐慌造就最佳入市時機，旗下基金趁機低買高賣，賺咗超過10%。「投資都係一門藝術，買入位靚唔靚，或者點樣捉到底位，都需要講究。」
論接班人「要領袖亦要領導」
既然運籌帷幄，理應毫無顧慮，唯一未能放低就係承傳問題，「Leadership要『領袖』，亦要領導。『領』同『袖』最易磨損，因為做領袖要凸個頭出嚟，行要行先，唔可以喺後面。領導就以身教下屬，一係自己訓練，一係出面訓練。」對於潛在接班人，自覺越嚟越好眼光嘅佢話，熱誠同心態好重要，「識得行多一步已經爭好遠。」