財爺鬍鬚曾任內第四份財政預算案低票過關，實屬正常，事關經修訂嘅預算案只係識派錢，有政黨唔收貨都合理，但鬍鬚曾似乎唔多忿氣，覺得派完錢只係換到33張支持票相當唔抵，噚日喺網誌撰文，點名怪責民主黨、公民黨同其他泛民議員堅持己見，指摘佢哋唔肯放下政治鬥爭思想，仲話喺派6,000元修正案上投棄權票即係反對，將一股怨氣發洩喺泛民身上。
想當初鬍鬚曾推出今年份預算案時，被人鬧到飛起，宣佈派錢後叫佢辭職落台之聲仍然不絕，唔係日本地震海嘯兼夾核危機吸引咗大家嘅注意力，佢都唔知點收科，家佢唔自我檢討仲一味鬧人，唔少政界中人都話大開眼界。既然求學不是求分數，求過關都唔係求票數啫，鬍鬚曾呢鋪大步檻過算執到，仲有口話人？