港股調整，在24000大關爭持，可視為升穿通道頂部的後抽整固，基本上市底好強，調整幅度應不會大，可能拖多兩三日，整固就會完成，再起升浪，升穿上次高位24466阻力，短期可向25500到26000進發。
近期成交縮減，一來係大市回氣，二來同窩輪商暫時收手有關。不過，現貨市場方面，唔少基金同大行仍在密密收集，但傾向個別操作，呢頭買、嗰頭㩒，目的只有一個，就係想買多啲貨；佢哋在現水平仍然仲咁積極，對後市信心之強，可以得見。
豐德麗（571）係近期明星股之一，短短幾日，就由1.70元升到上2.80元，升幅達64%，交投亦明顯轉活，雖然現水平追入風險已大，但若股價有機會出現調整，則正係分段低吸的大好機會，一隻股票升得咁勁，必然有因，下一個升浪，升勢可能一樣咁急。
股價仍大折讓44%
豐德麗在澳門氹仔有一個大Project，就係「星麗門」發展項目，但過去幾年進度停滯，唔單止賭場大計能否落實成為疑問，且股東之間亦因此而興訟。不過，相信在有心人士斡旋下，事情總會有解決的希望。
「星麗門」由豐德麗旗下的東亞衛視佔60%權益，NewCotai佔40%權益，豐德麗本身持有東亞衛視三分二股權，而餘下三分一則由新加坡上市公司嘉德置地持有。
「星麗門」為綜合休閒度假項目，集劇院、演奏廳、零售綜合大樓、拉斯維加斯式博彩設施及世界級酒店於一體，項目毗隣蓮花大橋入境檢查站，綜合大樓更直接連接到珠海的橫琴島。
豐德麗股價雖然急升，但相比NAV，仲係好吸引。2010年底，豐德麗每股NAV5元，股價仍有大折讓44%，假若「星麗門」爭拗能夠擺平，項目重新起動，則豐德麗估值將可大大提升，股價再升一倍，亦非沒有可能。
郭兆誠