《福布斯》雜誌主席福布斯（SteveForbes）上星期訪港出席美商會午餐會，大顯幽默健談本色，講起美國貨幣政策，福爺形容佢係全世界最悶嘅話題。
相睇唔啱心水 可悶走對方
潮流興環保，廢物可利用，福爺就諗到美國貨幣政策雖則唔掂，但仍有兩大用途：第一個係，相睇時，遇到唔啱心水嘅對象，即刻講貨幣政策，包保對方「知難而退」。第二個係，坐長途機時，如果鄰座乘客喋喋不休，就同佢傾貨幣政策，對方應該好快大覺瞓。
福爺仲狠批美國量化寬鬆政策，話根本救唔到經濟。
皆因如果印銀紙都可以解決經濟困難，當年一樣狂印銀紙嘅阿根廷，唔會搞到今時今日咁嘅地步，分分鐘做咗世界霸主，幾時輪到美國。