又濕又熱嘅天氣，連行街都覺得唔舒服，何況跑步？但為咗平反六四，一班支聯會噚日就一如往年，舉行長跑。今年跑22公里，跑足全程嘅支聯會副主席「狗哥」蔡耀昌都話唔係人人頂得住，但見佢去到中聯辦外仲有力氣衝破警方防線，證明佢體能唔錯，被抬上警車扣留後，狗哥仲話聽到車內警員叫外面嘅同袍搵安全地方卸彈，可能係驚擦槍走火。
其實50人大隊中，有成廿人都同佢一樣跑足全程，八方仲發現着住「平反六四，越走越近」T恤嘅隊伍跑到星光大道時，受到唔少內地同胞行注目禮。狗哥最意外嘅係，支聯會大隊途經嘅路口都有大批警員實，有警員仲發出溫馨提示，叫佢哋小心啲過馬路。