美國國務院上星期發表2010年人權報告，批評有啲香港傳媒因為老闆喺內地有生意，就自我審查。政制及內地事務局例牌出聲明還拖，八股文式咁回應話，香港新聞業嘅權利同自由受到《基本法》同《人權法》保障，點知中間爆出句「新聞自由是捍衞自我審查的最有效方法」。自我審查都要捍衞，睇到八方O晒嘴。
08年開始連錯四年
睇番當日新聞稿英文版，"Afreepress......isthemosteffectivesafeguardagainstself-censorship."，意思即係新聞自由防範自我審查最有效，中文稿嘅意思啱啱相反，可能因為政府繙譯做中文時，淨係見到safeguard，冇連埋against一齊譯，結果變成笑話。當晚CCTVB（無綫）報道呢單新聞時，仲直接引述咗呢句回應，唔通真係唔驚被人鬧「事事旦旦」？
八方初時以為，政制及內地事務局局長林D9啱啱通完波仔就返工鬼咁勤力，但做完手術可能精神點都差啲，所以睇漏眼都好難怪佢，但跟住睇真啲，原來08年至今美國人權報告都有批評香港部份傳媒自我審查，而特區政府呢句「新聞自由是捍衞自我審查的最有效方法」也自08年開始已經出現，之後政府每年照抄，從來唔糾正，結果連錯四年。
其實，既然政制局係以林D9呢部人肉錄音機為首，咁出新聞稿貫徹佢不斷重複又重複linetotake嘅作風，又有乜出奇？只係衰就衰在譯錯嘢啫。
偷偷更正後再死撐
政制及內地事務局已經偷偷更正咗新聞稿，捍衞二字換成抵禦，以為唔多覺，不過就唔該改埋前三年嘅新聞稿，先至可以完全毀屍滅迹。局方發言人回應時居然仲死撐話：「啲稿中英文一齊出，要中英文一齊睇」，仲話係因應外界意見，所以換字，認真吹脹。
如果捍衞同抵禦嘅意思冇分別，咁保安局前局長葉劉淑儀當年嘅金句，都可以改成「如果我連髮型都抵禦唔到，又點抵禦香港治安？」係咪。
mailto:[email protected]