好多人買二手車，最擔心就係俾人「篤數」，篤咩數？咪行車里數囉！錶板顯示個數，同實際可以好大出入。最近有老友想賣咗部老爺車，賣車前就去車房「執一執」，我八卦跟埋去睇吓，原來只靠部電腦篤幾吓，想將行車里數點改都得，我老友這部有8年車齡的老爺車行咗超過110,000公里，原本都幾「粗咪」，唔使5分鐘就「回復青春」，變回只行38,000的「假期車」，篤一篤盛惠$200。
咁得人驚，問番啲老行尊，買二手車點知佢篤數，佢話到明篤數無迹可尋，除非架車跟開原廠保養，可以要求車主出示保養單據；至於其他車，除咗要搵信得過嘅車行買車外，最好搵埋車房師傅或熟悉車嘅老友，同架車驗明正身，睇清楚零件損耗情況。