趙增熹，資深音樂人，與財經本來風馬牛不相及。不過，看過他在某保險公司的廣告特輯大談理財之道，你會發現，他並非只懂坐在評判椅上教導新人的音樂人，買過衍生產品，又是雷曼苦主，他其實是不折不扣的散戶。
記者：黃碧珊 攝影：羅君豪
場地：告士打道Kenon
髮型：EdenYip@ILColpo
約趙增熹做訪問，談的不是1、2、3，Do、Re、Me，而是2628、941。不錯，是財經人熟悉的國壽（2628）及中移動（941）。他說：「股神畢菲特係我第一個投資嘅啟發者，佢會買起間公司做老闆。」在《超級巨聲》評判椅上，他叫參賽者不要模仿，要唱回自己，在投資市場上他亦做回自己，畢菲特08年入股比亞迪（1211），他沒有照跟，「我一股都無買，因為升得太快，今日睇係呢個價，第二日又升咗，永遠追唔切，擔心升得急，跌得仲急。」比亞迪自畢菲特入股後，從約8.4元最高升至88.4元，上周五收報28.55元，累積升幅仍近2.4倍。
對股神的崇拜，在於對方奉行價值投資法，投資股票睇長線，「我唔炒即日鮮，從08年開始，我只留意兩隻股票，買咗就儲喺度，未沽過一手。」他說的正是國壽及中移動。
僅買國壽、中移動
為何揀這兩隻股票？「揀大公司，如果佢哋執笠，中國好多公司都已經唔掂。」難道他沒聽過美國投資大行雷曼倒閉前，亦有人認為這家投行大得不能倒閉嗎？他說：「我都係雷曼苦主！」
在音樂界成功的作品不計其數，但在投資市場，趙增熹失敗的「戰績」更彪炳，成為雷曼苦主，因連他自己亦不知買了甚麼投資產品，「06年買隻日經指數掛鈎的產品，話係保本，結果收番『零』。」類似情況，早有前科，「97年有銀行職員話息口咁低，不如投資基金，就將嗰時四至五成現金買落去，唔記得買咗乜，只知過咗年幾，蝕四至五成後即刻斬纜。」2000年在銀行開了股票戶口，買窩輪等衍生投資產品，「當時以為自己係投資，其實做嘅係投機，每日估升定跌。嗰時先發覺，港交所（388）其實可以係一個賭場。」
投資為追及通脹
雖然趙增熹的投資組合中，僅部份股票錄得回報，但他堅持投資，「唔投資追唔到通脹。不過，我正職係音樂，無時間成日睇住個市，投資應該搵專家。」他所指的專家並非假手於人，而是閱讀理財書籍，向投資專家學習。大部份人的財富都是辛勞工作累積而來，趙增熹亦不例外，「會搵一個安全、穩陣方法投資，做咗唔使擔心。」沒有能力預測市場將發生甚麼，惟有以時間待投資項目有所收成。
可有為退休生活安排，「我家做嘅就係為退休。」不過，他未有真正計算所需退休金，亦未有計劃，「未有諗幾時退休。如果聽日要退休，家有嘅股票、物業、強積金等應該唔夠用。」這位不折不扣的散戶，雖然未至聽消息炒股，但看來仍需要找理財專家，認真策劃未來日子。
趙增熹簡歷
．已婚，有1子（19歲）1女（17歲）
．自設錄音室及製作公司
．從事音樂製作約25年，擔任作曲、編曲、電影配樂、唱片監製、演唱會音樂總監、指揮等
曾參與工作：
．《雪狼湖》音樂劇指揮
．憑《甜蜜蜜》獲第16屆香港電影金像獎最佳電影原創音樂
．為《玻璃之城》、《金枝玉葉》、《安娜瑪德蓮娜》等電影配樂
．合作歌手包括梅艷芳、林憶蓮、張學友、李克勤、陳慧琳等
．任葉蒨文、劉德華、郭富城、鄭秀文、容祖兒等演唱會音樂總監
打本給子女？一定唔會
趙增熹的兒子今年19歲，遺傳了父親的音樂細胞，計劃攻讀音樂系。至於女兒，今年17歲，是末代預科會考生。擔任《超級巨聲》評判，對於參賽者，趙增熹要求甚高，對於自己的子女，雖然同樣要求嚴格，但沒有鐵腕政策，「無迫佢哋學音樂，個仔停咗好耐，十幾歲先學返琴，家準備考八級試。個女學琴當係佢自己設定任務，做事有頭有尾，考到八級就停。」不過，孩子自小耳濡目染，「覺得佢哋有音樂sense，不過未真正發揮，未知道會係點。」
趙增熹與拍檔成立公司，發掘樂壇新人。對於這門生意，他說，跟個人投資一樣，「用時間等種子成長，等待開花結果嘅一刻。」扶植樂壇新人，對於自己的子女，他又會否扶一把？
除咗錢其他都可以畀
如果有天孩子說，想入行，會否幫他們？
「佢哋比較獨立，應該唔想黐住我。如果問到，會幫手搵吓、搭吓路。」
如果有天孩子說，要擁有一間屬於自己的錄音室，會否打本給他們？
「一定唔會，應該要自己儲錢，因為自己嘅嘢要自己實踐。除咗錢，可以提供其他工具畀佢哋，好似教育、技巧等。」
黎小田賞識為梅艷芳和音
朋友要參加新秀歌唱比賽，找趙增熹做伴奏，無心插柳下，趙增熹開始音樂人的工作。從製作助理，到編曲、唱片監製。90年代初，監製的第一隻大碟，歌手是李健達。監製要跟不同歌手合作，產生不一樣的化學作用，所以一生也學不完。此外，得黎小田提攜，首次參與演唱會，做梅艷芳和音。
絕不放過機會
趙增熹說：「要把握機會，絕對唔會輕易放過，因為我已經諗住做，有人問到，唔使諗就應承。如果你唔得，之後唔會再搵你。」當年趙增熹沒有相關經驗，便擔任音樂劇《雪狼湖》的指揮工作，接洽後馬上找名師惡補。
最近他自資搞演唱會，「賣飛首兩星期，只係賣咗兩至三成門票，壓力好大，做咗咁多年，清楚演唱會宣傳期只係頭幾個星期，做一大堆訪問，賣到幾多就係幾多。」不過，努力後售票率每星期增長2%至3%，最終賣出九成門票，吁了一口氣。
