經常叫人唔好浪費警力嘅警隊，前兩日示範如何善用警力，超過500警員包圍立法會，過程中仲有近百警員對付一個女示威者。鷹派一哥嘅新人事新作風，連保安局前局長葉劉淑儀都覺唔妥，認為警力有被濫用之嫌。葉劉話，覺得警方今次太過如臨大敵，畀市民觀感上唔係咁好，佢仲質疑，警方其實應該收到情報，知道有幾多人示威。一位同警方溝通過嘅立法會議員，引述警方消息話，警方前日咁大陣仗係由於嚴重錯誤評估集會人數，以為會高達一萬人，加上由於李超人嘅長江中心日前被示威者衝擊，有人向政府告御狀，所以先會搞到警方咁騰雞。