話明係童話故事，來來去去都係嗰啲屎橋，《魔髮奇緣》亦唔例外，亦係爛命男主角救公主，再「嫁」入豪門，成個潮山聰咁款！唯一唔同，今次走佬公主亦有份落場開拖，最強武器係一把金髮，CG技術越嚟越出色，就連毛髮亦做到真嘅一樣。
記者、攝影：王震遠
人物凸到出鏡
《魔》Blu-ray一碟玩齊2D同3D！最受煲碟迷關注當然係3D版質素如何？煲慣影碟嘅Eddie就讚今次《魔》嘅立體感同景深做得好強，要數最正煲3D場口，首推費華特被捕一段：「呢段3D效果，個景深做得好凸出，畫面亦好Detail，你會睇到後面啲衫直頭有Texture，配合埋景深畀你嘅強烈感覺，人物角色簡直好似走出鏡頭一樣！」
講古！黑心老巫鬥公主
先爆吓古仔！喺好耐好耐之前，王后因體弱而難產，國王搵嚟有治療能力嘅神花，終於救返王后同小公主樂佩一命，而樂佩嘅一把長髮，仲繼承埋神花嘅醫病同回復青春能力。黑心女巫嘉芙貪圖神力，捉咗小公主困喺高塔18年！賊仔費華特誤打誤撞，救咗樂佩仲想帶佢遠走高飛，於是嘉芙使出反間計拆散鴛鴦之餘，仲令兩人跌入險境！
Barbie長髮有彈性
套戲主角唔係樂佩，反而係佢一把長髮！由頭到尾樂佩不斷將秀髮擺嚟擺去，紋理清晰之餘，反光位仲做得好仔細，睇落真係有啲似Barbie咁靚咁彈，用嚟試Blu-ray機細緻度最啱！配合故事係童話底，好多場口都大玩Colorful！例如樂佩屋企牆身，色澤鮮艷之餘，粉漆仲有Texture，亦值得留意！另外男女主角一齊放孔明燈一幕，滿天燈光，光暈可睇到弱光質感，而孔明燈主體亦無一味死光，強弱對比範圍都Show到晒出嚟！
《魔髮奇緣》
語言：中、英文（DD5.1）
售價：
$298（BD）
$128（DVD）
