曼聯同曼城聽日就會喺溫布萊球場進行英足盃曼市打吡戰，爭奪今季決賽入場券。場波雖然未開，不過經已㷫烚烚，事關紅魔後衞里奧費迪南公然唱衰曼城，話對方嘅球員當領隊文仙尼透明，全無紀律可言，唔學似佢哋咁上下一心，同埋咁識得尊師重道。
笑占士米拿被換唔順超
踢波冇錯係好講求技術，不過亦要睇班波夠唔夠和諧，好似曼城咁，係就係粒粒星；但個個睇到自己鬼死咁重要，一啲合作性都冇，所以喺今季亦交唔出好成績。其中喺禮拜一作客輸畀利物浦0:3場英超，佢哋中場占士米拿喺被領隊文仙尼換出之後，表現得極唔順超，曼聯中堅里奧費迪南就抽晒水咁話：「喺曼聯，你唔會見到有球員喺被換出之後，做埋啲頭擰擰等表達不滿嘅動作；亦唔會見到坐喺後備席上嘅球員，會喺度藐嘴藐舌。點解？因為喺曼聯效力嘅人，都對能成為紅魔一分子引以為榮。」
泰維斯受傷或要唞4周
里奧繼續話：「當領隊見到有球員唔尊重佢，一定唔會高興。領隊只用嗰啲願意為佢比賽嘅球員，至於嗰啲冇心一齊打天下嘅，當然係冇得留低。如果你問我點解曼聯會咁團結，我嘅答案會係『尊重球會、尊重領隊同埋尊重前輩球員』。」
曼城兜口兜面畀里奧話，唔知佢哋班球員會唔會有所覺悟，喺聽日踢番場爭氣波呢？話時話，曼城都算黑仔，原本泰維斯因大腿受傷而要休息兩周，家證實傷勢比想像中嚴重，或要唞足4周，對佢哋爭取來季歐聯入場券，真係有好大影響。
講開曼聯，聽聞佢哋已幫將於今夏退休嘅門將雲達沙搵到接班人，呢個人就係馬體會嘅20歲西班牙籍門將迪基亞。雖然領隊費Sir死口唔認，不過英國傳媒話迪基亞嘅轉會費係1,780萬鎊，仲簽咗5年約㖭。