王菀之再次挑戰自己，在舞台劇中飾演愛計算的港女，除了對白刻薄外，她更會與湯駿業扮演的花弗男上演一夜情，王菀之坦言事前不敢讓父母知道有此場戲，笑指還是待他們入場欣賞時自己發現。
繼舞台劇《柯迪夫》後，王菀之（Ivana）再次跟風車草劇團合作舞台劇「ILoveYouBecause」，是次扮演凡事愛計算的港女，除了對白抵死外，更會跟湯駿業（AhDee）有大膽床戲，她說：「雖然話係床戲，只不過係同張床有關啫，但係我都未知導演會點交代，因為仲未排。其實對我哋嚟講都唔係挑戰，係挑戰我爸爸媽媽啫，我未同佢哋講有床戲，都係等佢哋自己睇罷啦。」
享受去到盡感覺
劇中Ivana的性格跟現實相反，她坦言演起來有點難度：「我個角色係個精算師，乜都計算、好自大，會計同呢個男人上幾次床就會正式同佢一齊，分手幾耐就可以復原再投入下一段戀情，不過現實嘅我係個唔識計算嘅人，好易就會100%投入入去，好鍾意同好享受乜都去到最盡嗰種感覺，同呢個超級保留王嘅角色啱啱相反。」Ivana更坦言是被劇名所吸引才接演此劇。
要跟Ivana上演一場一夜情戲，AhDee坦言壓力頗大，他說：「你知佢個形象係幾咁乖啦，所以都驚，排之前都會溝通過先，聽講場床戲都激激哋，但想知有幾激，大家就要到場睇喇！」
湯駿業非即食男
AhDee在劇中擔演一名易來易去的即食男，不過現實的他也是相反：「我係個好麻煩嘅人，覺得對方係個有前途有將來、可以感動到我嘅，先會同佢開始，但其實我好恨自己係個角色嗰種人，因為好似永遠唔會gethurt咁。」而劇中經常要Ivana擔任其愛情顧問的邵美君，其角色也跟現實不同：「我個角色係乜都要人話佢聽點做，成日要問Ivana意見，但真實嘅我就係好有自己想法嘅人。」
採訪：譚倩宜
攝影：陳慧安
髮型：KateShekofHairCulture（王菀之）
JoofHairstage（AhDee）
化妝：MilkYuen
服飾：MarcbyMarcJacobs
