金像獎明晚舉行，最佳女主角一獎爭持激烈，近日有指不少評審屬意劉嘉玲獲獎，理由是嘉玲從未染指金像獎影后。其實她以武則天一角提名已引起爭議，假若真的因此封后，難免令人感到典禮已淪為論資排輩的地方。
第30屆香港電影金像獎結果明晚揭曉，據一名不願具名、有份在最後一輪替金像獎投票的評審表示，近年來金像獎的潛規則越來越明顯，劉青雲和任達華等入行久資歷深的演員紛紛獲獎，他說：「唔係話佢哋唔值得攞獎，但係有時時候未到唔可以夾硬嚟。好多人到今日都仲講緊舊年《十月圍城》王學圻輸畀《歲月神偷》任達華，多少都令人質疑金像獎嘅公信力。」
戲份難成女主角
該名人士又透露今年有評審私下謂是時候輪到劉嘉玲，令到她今年呼聲極高，該人指：「以戲論戲，其實影后應該離唔開楊千嬅同薛凱琪之爭，不過你講到論資排輩，又話嘉玲未攞過香港影后咁即係唔使選，鬥資歷深同朋友多。」
其實劉嘉玲憑《狄仁傑之通天帝國》中飾演武則天一角而問鼎金像獎影后，已經引來詬病，因為當中的戲份及角色不足以支持她入選。
該人士補充說：「金像獎話明係女主角，戲份當然要有番咁上下，嘉玲戲裏面角色應該唔算。當然提名乜嘢項目係電影公司填，但佢嘅入圍真係好有斟酌餘地，仲會令人懷疑有圍票。」他覺得假如出現太多同情票及累積票的話，金像獎會淪為跟內地長官意志壓到一切的頒獎禮無疑。
梁家輝不明入圍
其實同樣情形發生在今屆男主角入圍，提名人之一的梁家輝不明白自己為何可以憑《李小龍》獲選，因為戲份不算太多。
此外，今屆頒獎禮將於明晚在尖沙嘴文化中心舉行，到時亞洲電視及Now會全程直播。
撰文：李森