陳豪、吳卓羲、鍾嘉欣同楊怡等，噚日喺尖沙嘴宣傳無綫新劇《點解阿sir係阿sir》，其間佢哋仲將呢排紅爆、喺一日劇集入面死足五次嘅羅樂林擺上枱，要佢即場俾陳豪槍殺死多次，之後監製劉家豪即刻畀封利是羅樂林，仲笑住話：「大家放心，呢位國際巨星喺我齣劇唔使死，今次佢終於收到利是！」
活動後要飛去牙買加拍咖啡節目嘅陳豪，講到有傳因為好多小生花旦離巢，所以無綫要藝員提早加簽合約，陳豪話冇聽過呢個消息：「同TVB仲有年幾約，我哋關係好好，公司都畀到好多機會同名利我。」鍾嘉欣就話早前生日收到好多禮物，當中仲有本教拍拖嘅書。
吳卓羲同情林峯
至於同林峯情如兄弟嘅吳卓羲，講到有傳林峯同舊愛潘霜霜有條情慾片流出，佢話：「我有睇報道，得相啫，件事好應該完喇，好悶，個個禮拜都係佢！希望傳媒放過佢，希望佢（指潘霜霜）收手。」
吳卓羲話件事對拍緊劇嘅林峯都有啲影響：「導演會衡量，唔會要佢拍啲重戲份住。」問吳卓羲以後拍拖會唔會小心啲？佢話冇得小心，仲話自己都係人，都要拍拖，不過好彩冇遇過愛情陷阱。