自從會展新翼落成，太平山隻石龜走咗落海，香港好似冇行過好運。最近政府建議批出政府總部西座畀私人發展商，打算起座32層高嘅商業大廈。好好地嘅歷史建築群，就咁俾地產商霸埋。不過呢樣嘢都事小，有風水師同八方講，原來起座商廈會破壞晒整個香港嘅風水格局，從此自斷財路，都咪話唔驚。
左青龍右白虎
本身係資深建築師嘅蔣匡文，多年來鑽研術數命理，係行內出名嘅風水建築師。蔣師傅噚日帶八方到政府總部睇風水，佢唔使揸住羅庚都講得有紋有路。佢話前港督府，即現時嘅禮賓府，座落政府山正中間，係所謂嘅龍穴，旁邊嘅政府總部西座同中座，就係左青龍，右白虎，掌管香港保安；後面嘅動植物公園乃係朱雀，至於禮賓府遠眺嘅飛鵝山山尖，就可視之為玄武。
「如果西座突然起座30層高大廈，原本嘅風水格局就咁破壞晒。」蔣匡文話，禮賓府面向東北，對住成個維多利亞港，風水學上北方屬水，財位是也。如果喺政府總部西座原址起成座大廈，就會擋住北方財路，唔使問肯定會破財，「成幢大廈塞住，仲邊有財源入嚟？」
蔣匡文仲打趣話，起座咁高嘅大廈，左青龍冇晒威勢，好容易造成保安漏洞；起完座商廈之後，話唔定民怨爆燈，有人喺上面掟個炸彈落禮賓府都話唔定。自幼喺政府總部附近上學嘅蔣匡文話，以前政府總部好open，成日可以走來走去，方便市民。家就落晒鐵籠罩住晒，仲起座商廈破財，佢晒頭都唔明政府點解咁做，「咁會為子孫留下禍根」。
地勢失晒平衡
政府解釋過，中西區甲級商廈供不應求，所以將西座改建商廈。不過，「政府山關注組」成員、退休建築師李鉞踢爆，話以前政府總部東座係律政司辦公地方，中座屬財政司，較低層嘅西座就係接觸市民嘅部門。若然西座起座商廈，整個地勢失晒平衡，直情係傾斜晒㖭，唔怪之得呢個政府成日俾人鬧佢向商界傾斜喇。
mailto:[email protected]