趙敏華（Eva）創業初期主打禮品生意，原因是拍檔對禮品生意有豐富經驗，兼有一批熟客和相熟廠家。不過禮品種類繁多，加上行內競爭激烈，反而一般廣告公司提供的廣告傘款式不多，罕有提供設計服務，故成立廣告傘公司，開闢另類市場。
記者：陳皓怡 攝影：程志遠
趙敏華的廣告傘公司開業6年，有不少大品牌找她造傘，「家做緊唔同嘅客，好似銀行、醫管局、地產商同外國嘅時裝護膚品牌。」本地公司能吸引大品牌客戶，Eva解釋，「除咗一般要交貨快保持質素，仲要識同佢哋設計埋，做開市場推廣未必造遮。」
既識推廣，又識造傘，但廣告傘公司市場競爭大，「開呢間公司之前有唔止20間差唔多嘅公司，而且仲有唔少老行尊。」不過Eva對前景充滿信心，「好多同行係上一代或者係再上一代，時代唔同，客嘅要求都唔同咗。」她說，同行做法僅得A、B、C三個選擇，不是膠柄便是木柄，那麼現在的客人又有何要求？
選擇少難達顧客要求
「好似幫時裝公司造，佢哋要把遮好女性化，但又唔想大大個logo印上去咁老土。」Eva曾幫某地產商造傘，一個樓盤動輒千萬，廣告傘亦格外講究，「要皮手柄，出面睇一個款，入面睇又另一個款，要做兩層。」
廣告傘本身的功用就是推廣宣傳，Eva為他人作嫁衣裳，至於自己的公司，她靠的是口碑，「有啲公司想造遮會上網搵，格咗幾間公司價，比較邊間專業啲，又或者靠顧客嘅口碑。」企業是否願意花錢宣傳推廣，視乎經濟情況，08年金融海嘯，Eva的生意跌落谷底，「清晒手上嘅單就冇新單，每月一張單都未必有。」
自家品牌成失敗之作
在這段時間，Eva除了靠積蓄捱過，同時亦為迎接經濟好轉做準備，「平時忙，你唔會得閒諗點令內部系統完善，點樣加快效率，調整生產程序令產品更符合要求。」海嘯結束，她的定單亦由每月兩、三張定單，增至現時每月約10張。
不過，08年推出自家品牌納米傘卻成失敗之作，現在還未回本。她說，廣告傘與自家品牌的銷售額比例達9比1，不過她無後悔做自家品牌，相信仍有發展空間。
開業成本
租金：1.5萬元
裝修：4萬元
入貨：12萬元
水電：5000元
投資額：18萬元
註：包括3個月按金
每月收支
租金：1.5萬元
人工：3萬元
入貨：1.25萬元
水電：5000元
營業額：15萬元
打工十年為創業
Eva早有創業計劃，大學攻讀會計，「會計唔止有用，更係『必要』。每間公司核心就係盤數，識管好資金流，做好預算，冇可能假手於人。同埋有最基本嘅理財價值觀，咁就唔會冒太高風險。」她認為，風險越低，成功機會越大，「整間公司好多使費，如果你做好賬務，會睇到啲錢點樣流動，會唔會使大咗？喺前幾個月預視到發生乜事，及早避免。」
此外，創業前Eva任職不同公司，目的是儲足經驗圓創業夢。她認為，除了有穩健的財務，更要透過打工累積經驗，「要有學識，仲要實戰，物流、管理、產品銷售、市場推廣，唔止係講錢，要知道點樣送貨、報關都要知，好多濕碎嘢。」
讀會計管好資金流
打工10年，累積經驗之餘亦儲足彈藥，「打工一來儲經驗，二來儲錢，令生意影響唔到生活，亦唔會因為生活過度開銷影響到生意，創業時我儲咗幾十萬，夠食幾年。」
數口精之外，人際關係亦重要，Eva創業時參與創業計劃，志在結交不同朋友，「賺錢係一個環節，不過唔係最重要，要講機遇，有冇提攜你嘅客戶。」08年金融海嘯，她辦了不少社會服務，除做善事，亦提升公司形象。