一哥曾偉雄上場嘅時候，曾經咁樣訓勉啲結業學警：「你哋要關心市民，而且要讓佢哋知道你哋關心佢哋。」喺星期三，即係立法會預算案辯論當日，「女長毛」雷玉蓮就領略晒警隊關心市民嘅親民作風。話說嗰朝佢8點出門，樓下就有兩位疑似便衣警嘅男人跟住佢，由荃灣跟到中環。
到咗立法會，仲有四個疑似便衣警前後左右實蓮姐。直至夜晚立法會都散咗會，朝早嗰兩件仲未捨得蓮姐，到咗深宵11點，女長毛坐地鐵返歸，兩人先捨得收工。兩位特區公安盡忠職守愛民如子嘅英勇事迹，可以喺一條題為「白色恐怖！一名市民被多名特區公安、維穩警犬跟蹤」嘅YouTube短片上面欣賞得到。