導演谷德昭（肥谷）拍完賀歲片《神奇俠侶》後，暫未有新工作。一向識飲識食嘅肥谷大前晚九點幾，就出動同女友林子萱去上環一間新開張嘅中菜館晚膳。
久未露面嘅林子萱素顏戴住cap帽同肥谷對坐，唔知係咪冇化妝，林子萱嘅外貌顯得好攰好殘，不過就冇影響佢嘅食慾。現場所見，喺短短20分鐘裏面，身形瘦削嘅林子萱密密食，食量比體重超過200磅嘅肥谷勁，仲可以邊食邊同肥谷傾偈。
急步閃人
之後餐廳侍應發現記者喺門外拍攝，就安排兩人去咗一個記者睇唔到嘅地方坐。20分鐘後，肥谷嘅七人車出現，仲不停駛過前、後門，試圖分散記者注意力。經多次走位，見門外記者依然不為所動，肥谷嘅司機只好將車停喺門口，冇幾耐就見林子萱拉低帽低頭急步跑上車，而肥谷就緊隨其後上埋車。其實佢哋拍拖都已經係公開秘密，都唔明點解仲要玩神秘？
