華誼兄弟上市，王忠軍帶挈成班名星變身千萬富豪，不知恨死幾多人；似乎好快，內地創業板又會成就另一個神話！喺內地擁有「我的鋼鐵」、「我的不銹鋼」同「搜搜鋼」3個行業網站嘅上海鋼聯，正成功申請去創業板上市。根據招股文件披露，上海鋼聯嘅幕後大股東，原來係復星系老闆郭廣昌（圖），而公司諗住發1000萬股，佔發行股本總額25%，假如按60倍市盈率計，以2010年每股0.89元人民幣嘅收益計，咁招股價每股應該要過50蚊人仔！班業內人士話，郭廣昌自己固然有大筆落袋，而百幾個上海鋼聯嘅小股東，就有機會成為百萬富翁，昌哥真係好帶挈嘞！