本年度港男港女最期待嘅電影、中國3D數碼（8078）主席蕭定一話實會好震撼嘅《3D肉蒲團之極樂寶鑑》今日上畫嘞！華華有幸前晚跟大隊同班投資者去睇首映，先睹為快。未開場前，華華撞到ATV靚仔董事盛品儒，佢話係阿一請佢嚟睇嘅，仲叫佢當武俠片咁睇喎！至於班芬佬，大部份都話套戲好好笑、蕭若元保持到才子水準、啲女主角身材唔錯……唔知係咪因為咁，中國3D數碼股價噚日爆升17%，收報0.061元，呢下就真係夠震撼！
查實華華同班芬佬一樣笑足成場，呢套悲劇收場嘅艷情片點解咁好笑？Well，咪因為啲低能同爆粗對白囉！至於華華期待嘅3D場面同視覺效果，可以話畀大家聽，應該3D嘅就無3D，不過如果你對SM有特別喜好嘅話，應該會幾鍾意呢套戲嘅！