唔好以為只係做財經嘅人先識投資，其實呢個世界「天外有天，人外有人」。好似噚日公司部電腦壞咗，敏妮即刻call電腦部同事修理，就喺等部電腦復原時，敏妮知道呢位同事一向有玩開期權，當然同佢傾吓有乜心水策略。同事煞有介事話，「恒指會見兩萬六」，亦因為咁，所以佢做咗ShortPut期權，Put嘅唔係恒指，而係中國移動（941）。
睇好恒指，ShortPut中移動好合理，因為恒指升得起，中移動斷估唔會死。問題係，敏妮唔明點解同事咁相信恒指會見兩萬六。同事show咗張恒指圖畀敏妮睇，話舊年4月到11月，呢7個月嘅恒指走勢圖，同舊年11月到家嘅走勢十分相似，加上恐慌指數有所回落，所以支持佢睇好後市。
巧用期權 捕捉升浪
睇圖敏妮仲未到家，見同事一邊講、一邊喺張圖度指指點點，聽落又真係有幾分相似。不過，講到睇走勢圖，最就手係問吓名家魏力。佢聽敏妮咁講，都即刻開張圖嚟睇。財經人睇圖同行外人係有啲分別，佢話單睇高位，舊年11月之前嗰7個月嘅走勢，的確同之後有啲相似，但技術派睇圖要量度，一度個低位，舊年11月後至家陣，低位一個低於一個，魏力話，「同之前嗰7個月，低位一個高於一個唔同，嗰陣個勢好過家陣噃。」
後市有冇機會見兩萬六，家陣大家都唔會知，不過，魏力就話，照家陣個形勢，睇好中移動都合理，再講，舊年11月起計數7個月，即係今年6月到期，仲有咁多時間，如果勢色唔對的話，平倉或者Long番中移動Put都可以補救到，睇錯都有方法救，呢啲就係學識期權嘅好處。
溫敏妮
http://wanmanli.com/blogs/