同場加映紅軍嘅「空中霸王」安祖卡路爾與「新丁」費拿根嘅故事，班「粉絲」見佢哋兩個勁成咁，個心都甜埋。喺季中從紐記以3,500萬鎊（約4.4億港元）加盟利物浦嘅前鋒安祖卡路爾亦成為焦點所在；之前佢幫紅軍踢咗5場波都冇波入，不過喺前晚終於開齋，仲入夠兩粒，先左腳勁射破網；再泰山壓頂頭槌頂入，盡顯身價。
費拿根幫爸爸圓夢
除咗安祖卡路爾，首次幫利記A隊比賽嘅18歲右後衞費拿根都好搶鏡，原來佢喺賽前兩粒鐘先由杜帥通知會正選鬥曼城，賽後佢話要將「處子戰」送畀佢爸爸，因為佢爸爸以前都係利物浦青年軍，不過就上唔到A隊，家陣佢總算幫爸爸完成夢想。