賭王何鴻燊終於退落嚟，仲要搵鬼佬做接班人！唔使驚，唔係佢屋企啲生意，而係香港地產建設商會會長個位！
地產建設商會噚日宣佈，做咗27年會長嘅賭王，「升呢」成為永遠名譽會長，而接替佢嘅，並唔係資歷深厚嘅新世界（017）首席顧問梁志堅，或者任何一位華資地產商大孖沙，而係太古地產前主席兼行政總裁簡基富。至於近年專責代表商會向傳媒解話嘅梁志堅，亦「升呢」由執行委員會副主席升做主席。全部新職位任期都係兩年。
華資免傷和氣 簡基富跑出
地產建設商會有65年歷史，首任會長係霍英東，賭王由84年開始做到家，一直好似無人可以代替佢嘅地位咁，但自從佢跌親入院，到今年初屋企爆出「分燊家」事件，雖然電視鏡頭前仍然好健壯，但大家關注佢身體嘅真實狀況，況且佢都真係80幾歲，所以搵人替代佢只係遲早嘅事。
咁睇睇班候選接班人嘅牌面，新地（016）副主席郭炳江係商會第一副會長，新地又係本港主要地產商，佢做會長應該無咩問題；至於簡基富，係商會前執行委員會主席，都夠份量，但拍埋班大孖沙度，硬係好似欠咗啲嘢咁。
之不過咁，聽聞因為個個華資大孖沙都咁高咁大，為免傷和氣，於是咪選咗人人都可以接受嘅簡基富囉。
講番簡基富，佢喺09年中已經退休離開太古地產，之後一直維持喺商會嘅職務，聽聞家自己開咗間公司，繼續搞地產相關業務，但就好鬼低調。今番做咗會長，唔知以後會唔會蒲多啲頭，同梁志堅一齊分擔下工作咁呢？
李華華
mailto:[email protected]