弊傢伙！曼城前日作客慘吞利物浦3蛋，大敗已夠衰，最慘係大將泰維斯早段傷出，而臨危受命嘅巴洛迪利落場後夢遊球場，領隊文仙尼家陣肯定震過貓王。周末英足盃曼徹斯特打吡在即，佢手上籌碼又唔多，呢一注，仲敢唔敢押喺巴洛迪利呢個衰仔身上？
泰維斯拉傷難戰魔
吖吔吔，泰維斯拉傷腿肌，16分鐘就因傷退下火線，事後證實要唞兩個禮拜，唔使旨意喺禮拜六對曼聯場英足盃準決賽披甲，真係佢痛在身，文仙尼痛在心。大將離場，佢冇辦法唔用頹兵巴洛迪利。呢位仁兄投「城」後冇踢過幾多場好波，有傳同田徑運動員出身、09年參選過意大利小姐嘅嘉琳比迪（Galimberti）喺facebook相識後搭上，近日仲同女方過夜，獨處幾小時。
怕且巴洛迪利前日踢波時，仲諗緊同人溫存嘅無限春光，結果成場波踢到好似夢遊咁，毫無威脅，文仙尼去到末段都頂佢唔順換番走佢。文帥呢場波擺明留力，先收起大衛施華同埋尼祖迪莊，但輸得咁甘，令佢無辦法唔向球迷道歉：「我錯啦！我以為班球員可以踢得好一啲，結果大錯特錯！」錯一次夠晒，如果對曼聯場波衰埋，莫講話今季4大皆空，文帥自己個飯碗肯定保唔住。好想知，到時佢仲敢唔敢重用巴洛迪利？
紅軍3:0贏曼城復仇
講番場波，利物浦喺13分鐘由安祖卡路爾開齋，而佢好事成雙，當隊友古積特射成2:0後，佢之後再入一球埋齋，令利物浦啱啱好報番首循環輸0:3嘅一戰之仇。家陣紅軍排第6，比少賽1場排第5嘅熱刺少5分，力爭踢來屆歐洲賽未絕望，曼城領先熱刺3分，踢多1場，前4隨時不保。