香港資源（2882）同國藝控股（8228），前者令人諗起金廁所金馬車，後者就令人諗起詠春、冼國林，但不久將來，呢兩間公司將會令大家諗起黃大仙同地藏菩薩！善哉善哉！
用50公斤黃金 申請入健力士
消息人士同華華講，香港資源嘅老闆黃英豪、董事徐傳順，同埋國藝嘅老闆冼國林，將會捐錢喺佛山國藝嘅「西樵山夢工場」門口隔籬幅地，起一間黃大仙廟同一間地藏菩薩廟，兩間廟應該喺7月尾開幕，俾大家參拜。兩間廟最特別之處，係其中嘅黃大仙金身，將會用50公斤黃金打造，由金至尊一手包辦，家仲申請緊入健力士世界紀錄大全！
點解會起廟供奉黃大仙同地藏菩薩？話說冼國林本身係篤信道教嘅，而黃大仙廟係一早喺當日佢將「西樵山夢工場」注入國藝嗰陣，寫明會起嘅；至於地藏菩薩廟，就係信徒徐傳順見幅地咁大用唔晒，於是捐錢起間地藏菩薩廟，宏揚「安忍不動，猶如大地」。黃英豪同徐傳順仲會出任呢兩間廟嘅管理委員會主席。
講開捐錢，黃英豪可謂不遺餘力，繼上星期捐咗50萬英鎊畀佢自己嘅母校肯特大學，噚日再下一城，趁香港大學第五屆「明德教授席」就職典禮，同佢爸爸黃乾亨夾份捐1000萬港紙，成立黃乾亨黃英豪基金教授席（政治經濟學），履任教授為王于漸教授。黃生咁有善心，又起廟又施學，華華誠心祝佢越活越年輕，身壯力健再幫多啲有需要嘅人！
mailto:[email protected]