開心飛起：仆倒總統兩個轆　熱鬥F1人人爭玩

好多愛車之人都希望有機會到外地觀摩一級方程式賽事，既可旅遊又可感受方程式賽車的震撼力。2011年賽程19個分站5個鄰近香港，其中上海及新加坡旅遊的吸引力一般，日本可能會受核輻射影響，唯一抵玩又有特色的只有第二站──馬來西亞。

記者、攝影：蕭漢祥

鳴謝：馬來西亞旅遊促進局（香港分局）、馬航假期

門票最貴$3,000

■馬來西亞是今年F1賽事的第二站。（路透社）

1999年建成的雪邦賽車場，位於吉隆坡以南約60公里，正正在馬來西亞最主要的機場──吉隆坡國際機場旁邊。雪邦的周邊非常空曠，食買玩任何一樣都找不到，除了在賽車場內！馬來西亞分站的賽果最後是由紅牛車手維特爾勝出，不過小記較關心的，是場內有甚麼好玩好看。雖然馬來西亞的生活指數低，但F1門票由最平$84至$3,000一張都有，小記今次手持的一千元馬幣門票，差不多等於普通馬拉打工仔三分之一月薪，不過相對於其他國家仍可接受，所以場內除了一班歐美擁躉外，更有不少日本、韓國、香港車迷入場。

■除了足球，F1都擁有大量英國粉絲，未知他們支持咸美頓還是畢特。

■這班英國車迷遠道而來為偶像打氣。

■KMX仰卧單車只需$26/15分鐘，價錢合理。

個個排玩Segway

整個雪邦賽車場約有兩成地方完全與賽車無關，就在大門與看台之間的一小段路，完全是為照顧陪爸爸、老公或男友來賽場的太太、女友和小朋友們。小路上設置多個遊樂場，有攀石、KMX仰卧單車、Segway兩輪車及水中浮波等，全部要自費。其中Segway兩輪車因感覺新鮮又有型，且時速高達20公里，本身又可自行平衡，不易讓人摔倒，是以較受歡迎，即使要$65玩15分鐘，都有幾十人排隊輪候；其次是KMX單車，吐露港租車店約要一百元左右，這裏$26有得玩。

■Segway兩輪車，是場中最受歡迎活動，$65/15分鐘。

■07年美國總統布殊便因玩Segway而仆倒。

龍友攻陷品牌攤檔

場內亦設多個大型帳篷作推廣、展覽場地之用，主要都是法拉利、Mercedes-Benz、Petronas的天下，售賣的紀念品價錢不便宜，cap帽、衣服每件賣$387，很多女裝衫每件更要$1,160！至於另一邊的電子產品品牌攤檔，則滿佈「Global龍友」，他們齊齊拿起相機不斷拍攝美女promoter美態，就連賣衣服、紀念品的姐姐都不放過呢！

■一進會場，就有美女向你兜售接收賽事旁述的耳機，每個$387。

■賽車game設駕駛座位及方向盤，不只小朋友，連大人都好想玩。

■攀石牆難度極低，只需10秒就攀完，每次$26。

■不斷改變promoter組合來迎合龍友需要。

漢堡醫肚最穩陣

世界各地體育場館都有一個現象，就是場內食肆選擇不多，雪邦賽車場也一樣，閘內加閘外對面的餐廳都是只得9間食店，提供的菜式有美式漢堡、熱狗、日式壽司、泰式串燒及歐陸風味PretzelDog。論穩陣又飽肚，首推PretzelDog，類似熱狗烘得外脆內軟。如果想食得好點，惟有走回半公里遠的大門口，旁邊有一間可坐得舒服的餐廳，但內裏只得一種套票售賣，即主菜有牛、雞、羊任擇其一，配飯和蔬菜，仲有非常美味的呍呢拿雪糕配朱古力蛋糕，及冷熱飲品各1杯，每位盛惠$206。