唔少股壇前輩都教敏妮，睇上市公司通告搵炒股靈感。港交所（388）早喺每個交易日早上六點幾已開始有上市公司嘅通告，敏妮尤其鍾意睇復牌通告，因為好多時都會尋到寶。不過，近排敏妮就差啲坐艇。
話說永興國際（621）上個禮拜三復牌，公佈得到著名嘅國際黃金投資者ThomasKaplan注入兩個金礦，成為新大股東。近期金價屢創新高，永興出呢單新聞，點睇都係好消息。敏妮嗰日SMS提醒幾位「股友」，其中一位望完份通告，都認為有得炒，喺開市前嘅競價時段擺盤買入，點知差啲坐艇。
股價爆升一閃即逝
其實隻股真係有受到消息刺激，但只係喺競價時段同開市冇耐。隻股停牌前報6毫4，復牌高開4個仙，跟住爆上8毫1，之後可以用插水式下跌嚟形容，跌到當日低位6毫，之後莫講話8毫咁大想頭，7毫都見唔到。好彩，買入嘅「股友」見勢色唔對平手走，至於當日見隻股升、又知有好消息跟尾嘅投資者，如果心雄追入，好大機會坐艇。
敏妮以前都試過類似情況，就係隔晚睇通告，搵到心水股份，驚開市就升咗上去唔敢追，於是晨早起身捕住，競價時段擺盤。以為「早起的鳥兒有蟲食」，點知變咗早起的鳥兒「捉蟲」了。更試過唔甘心，認為隻股應會達目標價，所以唔肯沽貨，結果坐艇好一陣子。家陣敏妮學精咗，寧買貴都唔好買錯，睇定先買，追唔切最多唔賺都好過蝕。敏妮仲未膽大心細、身手敏捷到好似股壇前輩咁，競價時段買，掛高幾個價開市即沽咁勁。
溫敏妮
http://wanmanli.com/blogs/