意甲「儍豹」巴勒莫不嬲古靈精怪，好似前日場意甲領先兩球，都喺補時被最終10人應戰嘅切塞納連入兩球和2:2。到底呢隻「儍豹」，係真儍定造假？只知正牌莊家馬會一定唔儍，整輪意甲只有3場冇開，其中包括巴勒莫場波，將呢隻「儍豹」拒諸門外。
足智彩去到意甲季尾冇場場開盤，可以話係家常便飯，但時值4月就唔開就早咗啲。呢隻「儍豹」今季真係好多古靈精怪戰果，禮拜日場波之後排第8位，爭歐洲賽資格難度高，降班又唔到佢；最後6輪比賽，怕且足智彩都未必有好多場再預呢隊波。
領先兩粒踢多個都和
講番前日場波，戰況又真係好離奇，呢場波係巴勒莫教練羅斯食回頭草，離開球會35日後首場領軍比賽，仲得到球迷起立鼓掌。球員好識做，一開波就踢得起勁，由古亞迪、賓利拿各入一球，去到上半場36分鐘已領先2:0，當時，邊個估到今季只贏兩場作客嘅客隊有得追？去到74分鐘，切塞納仲要踢少一個（另一個喺後備席被逐），殊不知去到合計有9分鐘超長補時，切塞納竟然有能力連入兩球，扳平後又有一場外球員被逐，無相干囉！
巴勒莫係西西里首府，西西里係黑手黨發源地，過去「儍豹」周不時出現奇異賽果，好難唔令人有所聯想。事實上，呢個南部地區不嬲都多事故，而球迷又鍾意搞事，意大利躉一定記得07年卡坦尼亞對巴勒莫嘅西西里打吡，因為爆發球迷大騷亂，釀成一名警官被炸死嘅慘劇。呢件事，令到意甲一度停頓，當年係國際版頭條大事件。
巴勒莫今季出現唔少好激嘅戰果，淨係下半季就主場對國際米蘭領先兩球，到完場前倒輸2:3，而2月尾主場吞烏甸尼斯7蛋；加埋前日呢場經典，咁嘅劇本，奧斯卡最佳編劇都未必寫得到！
