前日（星期一）華華路經金銀業貿易場，見人頭湧湧，新正頭團拜咁款，理事長Haywood（張德熙，圖）同成班阿頭齊晒人腳，究竟搞邊科呢？唔通係為咗就快推出嘅人民幣黃金公斤條做rehearsal?
原來華華諗快咗！老友話，呢隻新產品已經如火如荼，應該如期6月前面世，Haywood呢排忙到出煙，忙咩？見人係其中之一！見咩人咁巴閉？首先，好多唔同地方嘅金商，都有興趣同貿易場傾下有無合作機會，至於前日就更加勁，原來上海黃金交易所大軍南下，同Haywood佢哋就人民幣公斤條交流意見，睇下貿易場會點搞。
上金所好有心，為貿易場班阿頭引見人民銀行金融市場司司長，據聞司長對實金交易、實金會員監管、交收等都好有興趣去了解。忙成咁，唔怪之得Haywood無時間履行同華華嘅雪茄約會啦！