登登登凳！香港打工皇帝又揭盅嘞。日日幫老闆做世界嘅和黃（013）董事總經理霍建寧，2010年以1.54億元嘅總酬金再次稱王，成為全港打工仔嘅偶像！霍大班2009年係收1.24億嘅，點解2010年多咗，主要係花紅增加咗近3000萬。對佢嚟講，首富李超人絕對係良心僱主，霍大班喺早前嘅業績會亦曾經高呼「和記人工真係好高o架！」華華feel到佢係發自內心講嘅！
霍建寧舊年袋1.54億
除咗霍大班，超人對班高層夥計都非常唔錯o架，好似幾個董事──周胡慕芳、陸法蘭、黎啟明同甘慶林，至平嘅甘氏都收1517萬一年，其他嗰三個就三千幾、四千萬年薪，所以呢，就算香港有幾多人對首富有意見，亦有好多人想同佢打工o架！
打工嘅收咁貴，咁做老闆嘅超人同小超人又收幾銀呢？先講小超人李澤鉅，立立雜雜計晒之後，大少係收5637萬，比起2009年多咗992萬，都係花紅多咗喇！至於超人自己，well，佢老人家繼續象徵式收5萬蚊董事袍金。咦，咁用最低工資時薪28蚊嚟計，佢低好多喎，如果今年都係咁，公司會唔會犯法呢？其實佢兩仔爺收幾多都無乜所謂啦，間公司係佢哋嘅，人工，只係一個填喺年報畀大家睇嘅數字啫！
李華華
mailto:[email protected]