伯明翰班主卡臣楊（楊家誠）生活多姿多采，上周五再為大家帶來驚喜，今次唔係佢隊波喺綠茵場上再創奇蹟，而係佢千金Camilla（卡米拉）百日生辰，有錢老竇喺深圳福田香格里拉酒店筵開30席。內地傳媒報道，BB女一餐生日酒，估計使費要成100萬。
《成報》勁讚老闆娘
貴為「英超史上首位中國老闆」，卡臣楊財力當然雄厚過人。根據卡臣楊旗下《成報》噚日報道，當晚「冠蓋雲集，喜氣洋洋」，精采場面包括卡臣楊喺台上為愛女獻唱一曲《天亮了》，《成報》仲提到「楊太更是充份顯示母愛使女人更美麗的道理，一襲飄逸的紅色晚裝盡顯雍容優雅，幸福滿臉，絕不讓台上的時裝表演專美」。
《成報》話BB女「Camilla單是名字已透達着美貌與智慧」。「可愛的小生命無論抱到哪裏，都是全場的焦點，令寬廣的酒店宴會廳洋溢着一片平和吉慶的氣氛」。全場高潮係卡臣楊即場為愛女製作腳印模型。一場百日宴都可以搞得咁有聲有色，真係點到你唔服。