舒淇和劉燁昨日在港宣傳愛情片《不再讓你孤單》，提到和彭于晏的姊弟戀近日再傳得熱烘烘，舒淇聲稱是舊聞翻炒，她反而希望男方找個合適年紀的對象。舒淇本周六便35歲生日，她直認單拖dry爆度過。
劉偉強執導的電影《不再讓你孤單》昨日在旺角宣傳，男女主角劉燁和舒淇現身造勢，席間更義賣為「光纖之父」高錕的慈善基金籌款，高錕和太太也到場支持。
題字花足兩小時
舒淇除了出力義賣，更即場題字寫下戲名來拍賣，有姿勢有實際，原來電影海報上的戲名也由舒淇所寫，劉偉強說：「唔想用電腦字冇感情，靚唔靚係其次，用心最緊要。」舒淇透露當日剛落機便被導演捉着到寫字樓題字，足足花了兩小時才完成，她又表示拍這片流了很多眼淚，簡直是精神折磨。
舒淇昨日首次見高錕夫婦，提到高錕有腦退化症，但高太依然不離不棄，舒淇也不禁眼紅紅。早前舒淇出席好友林熙蕾（Kelly）婚禮，問一對新人有否介紹男仔給她認識？舒淇說：「Kelly嘅婚禮好簡單，冇伴郎伴娘，我只係想見佢老公，所以專登飛去，真係一個幾好男仔。」會否如林熙蕾般閃電結婚？舒淇笑說：「佢哋唔係好閃，識咗3個月，Kelly話同老公好似識咗一世咁，咁sweet梗冇問題。」
日前被目睹與曾傳緋聞的台灣偶像彭于晏夜蒲約會，舒淇聞言說：「年幾前同佢拍MV時講過，冇嘢搵番嚟講。」雙方有否發展機會？舒淇笑說：「佢係個好男仔，應該搵番個好女仔，而我係女人。」是否嫌彭于晏年輕過自己6年？她表示沒想過這問題。
讚潘霜霜乜都正
本周六是舒淇35歲生日，有沒有男伴一同度過？她笑說：「冇機會，我都想識番個，想有人錫吓自己。」有人覺得林峯舊愛潘霜霜貌似舒淇，她笑笑口謂：「佢正過自己好多，乜都正呀。」
採訪：魯萍
攝影：仇志德